Day 1
京士頓: 千島
渥太華: 國會山莊, 皇家鑄幣廠, 國家文明博物館
千島
由 多倫多出發﹐沿 401 公路向東行經過兩個半車程終於到達京士頓 (Kingston)。係麥記食完早餐後就去今個旅行既第一個景點就係乘搭遊船遊覽千島湖 (Thousand Islands)。千島湖內有好多小島﹐好多島都被富豪買左黎做暑假別墅。遊船經過好多個島﹐其中一個島好出名既就係「心型島」 (Heart Island)。好多年前有個富豪﹐好愛佢老婆﹐想起一個好靚既城堡比佢。個城堡叫做 「Boldt Castle」﹐島上有水電﹐城堡有好多間房間﹐仲有保齡球場同其他設施。可惜城堡未完工佢老婆就已經過左身﹐之後個富豪都死左。而家島上個城堡係一個熱 門既旅遊景點。(註﹕只係春季同夏季先有遊船遊覽千島湖)
國會山莊
遊完千島就繼續沿 401 公路向東行去到加拿大既首都 - 渥太華 (Ottawa)。當然要參觀近百年歷史﹐位於渥太華河上既國會山莊 (Parliament Hill)。國會有三個大樓 - 中大樓、東大樓和西大樓。中大樓既「和平塔」(Peace Tower) 係加國既像徵。國會前有個燒天然氣既「百年火」(Centennial Flame)。呢個火係 1967 年1月1日前一晚為慶祝加拿大立國 100 周年紀念﹐由當時加國總理皮爾遜 (Lester B. Pearson) 點既。(註﹕每年五月都有好靚既鬱金香節)
皇家鑄幣廠
渥太華既另一個景點係皇家鑄幣廠 (Royal Canadian Mint)。入面有專人第你參觀鑄幣過程。雖然而家用緊既硬幣都已經係溫尼柏 (Winnipeg) 制造。渥太華既鑄幣廠而家係做特別版既硬幣 - 例如奧運記念幣。皇家鑄幣廠仲有幫其他地方制造硬幣 - 例如香港既二元硬幣。觀光後可以親手拿起一塊好重﹐真既金磚﹗個金磚有鐵鏈鎖住﹐仲有個有槍既保安員睇你﹐肯定你用雙手拿起。因為今年係皇家鑄幣廠 100 周年紀念﹐有一部機器可以比你用 $2 硬幣即時壓製一個無面值既紀念硬幣。鑄幣廠仲有好多唔同既紀念品賣﹐如各款特別版既紀念硬幣。我最後就買左一樽細細既金薄﹐幾別徵。
國家文明博物館
渥 太華既最後一個景點就係國家文明博物館 (Canadian Museum of Civilization)。裡面有好多個唔同既展廳介紹加國歷史﹐當中包括加國原住民展廳。而且有一個好岩小朋友既兒童館﹐連大人都可以一樣玩得好開心 ﹗博物館外面可以望到國會山莊為於渥太華河既高處。(註﹕記住要出去博物館外面影國會山莊﹐真係好靚架﹗)
皇家山
遊 完渥太華就繼續沿高速公路向東行﹐下一個目的地係位於魁北剋省 (Quebec) 既滿地可 (Montreal)。因為魁北剋省係幾百年前法國人既居住地﹐所以到而家既主要語言都法語。 滿地可個名係黎自城中一個山 -「皇家山」(Mont-Royal)﹐Montreal 就係同個山既法文讀音相似。山上有一個十字架﹐因為幾百年前當地有一個大水災﹐好多人就去教堂祈禱﹐希望籍聖母瑪利亞既轉禱可以平息水災。最後真係奇積地 無事﹐所以 D 人就為左感謝天主而係係山上放一個好高既十字架。個十字架以前係用燈膽發光﹐當教宗離世既時後就會換唔同色既燈膽直到新教宗被選出。
喜來登酒店
經過一日既旅程就入住滿地可四星級既喜來登酒店 (Le Centre Sheraton Montreal)。Check-in 後就去左間既好而且幾貴既餐廳食晚餐。唔記得個全名﹐只係知叫做 「RD」。
Day 2
滿地可: 聖若瑟大教堂, 聖母院, 自然生物館
魁北克: 古城
聖若瑟大教堂
今日一早就去左位於「皇家山」上既聖若瑟大教堂 (St. Joseph Oratory)。由於係星期日既關係﹐有十多架旅遊巴已經係上面﹐D 巴士排隊上山都要一段時間。有 D 朝聖者更選擇行幾百級既樓梯上教堂。一去到就有一個小鐘樓﹐隔黎就係入口。一入去就係祈禱小教堂 (Prayer Chapel)﹐自由奉獻後可以點一支祈禱蠟燭 ﹐然後祈禱。之後可以參館 Blessed Brother Andre (真福安德弟兄)既博物館。安德弟兄本來係修院做清潔﹐後來被人發然佢有神奇既治癒能力。聖若瑟像前有一個油燈﹐係用植物油。安德弟兄經常叫人用個 D 油燈按摩。教堂內有數以千計既柺杖﹐都係一 D 本來唔可以行路但得安德弟兄醫好而留底既。安德弟兄1937 年去世時﹐過百萬人參禮。1982 年﹐教宗若望保祿二世宣佈安德弟兄為「真福」(Blessed) - 一個宣佈為「聖人」(Saint) 前既階段。而家德弟兄為個心安放係教堂內被遊人參觀。大教堂內因近年修理而變得現代化。教堂既記念品店有得賣安德弟兄叫人用既聖若瑟聖油。(註﹕山上大教堂門外﹐高高在上﹐可以望到好靚既滿地可景色)
聖母院
下一個景點係滿地可既聖母院。教堂外面無乜特別﹐但係入面花左十幾年用人手整既雕刻同畫都好靚。但係當我去到既時候正開緊彌撒﹐所以只可以係教堂內既後面參觀﹐而且唔比影相。但係彌撒進行既時候既風琴音樂幾好聽。(註﹕教堂門外對面馬路影相唔錯)
自然生物館
下一個景點就係自然生物館﹐前身係滿地可 1976 年夏季奧運會既單車場館。參館生物館前先上左奧運斜塔﹐特別既係上斜塔架電梯都係斜既梯仲有上下層﹐架電。電梯內可以欣賞好靚既滿地可景色﹐而且落既時候幾刺激﹗上到上面既景都好正。(註﹕搭電梯上斜塔既話﹐不妨試下上既時候搭上層﹐落既時候搭下層... 仲有﹐上斜塔之前可以順便參觀隔離既前奧運游泳館)
古城
食完 lunch 就沿 20 公路往東行﹐前往魁北剋市 (Quebec City)。舊城內有北美洲內唯一有城牆既城市。古城內最有代表性既就係建於 1893 年既「古堡酒店」 (Chateau Frontenac)﹐由加拿大太平洋鐵路公司當年為左吸引富有既旅客搭佢地 D 火車而興建既。古城內既街道都好狹窄﹐因為以前都係比馬車行既。古城內既建築充滿法國色彩﹐有如置身於法國﹗古城下就係聖羅倫斯河﹐風景優美。古城耐既 「皇家廣場」(Place-Royale) 係幾百年前做皮草交易買賣既地方。廣場附近有一幅幾出名既壁畫 -「四季畫」。(註﹕古城內好多地方賣手信)
希爾頓酒店
夜晚入住鄰近酒吧區既希爾頓酒店 (Hilton Quebec)。如果遇到球賽既日子﹐夜晚出外要小心。我個晚食完飯行夜街既時候﹐係條大街上﹐好多人﹐但係 D 球迷咩飲醉已經鬧事﹐係正我前面打仲跌左係我腳前﹗
Day 3
莫斯堡: 上加拿大村
高爾本: 大蘋果
上加拿大村
今日係最後一日﹐要趕 800 多公里由魁北剋市返回多倫多。係公路到往西行﹐停休息站時食早餐。幾個鐘頭後食 lunch。再繼續搭車去上加拿大村 (Upper Canada Village)。上加拿大 (Upper Canada) 就係而家講英文既安大略省 (Ontario) ﹐下加拿大 (LowerCanada) 就係而家講法文既魁北剋省 (Quebec)。個古村就係百多年前上加拿大既環境。 因為今日落雨﹐所以一落車就買左見膠雨衣。一開始就搭馬車係古村裡面兜一個圈。周圍既建築同穿著古服既人物都係同以前一樣。村內有學校﹐雜貨店﹐酒店﹐鐵 匠工場﹐麵飽烘房﹐芝士工場﹐印刷工場﹐教堂﹐等等。村內亦都有馬房﹐雞場﹐牧羊場 - 真係有動物架﹗最後﹐紀念品店有新鮮用古法製成既麵飽﹐芝士﹐等等。我都買左條麥飽﹐熱辣辣﹐好香架﹗ (註﹕紀念品店既麵飽好新鮮﹐但要快 D 食﹐因為幾個鐘後就會好硬﹐無咁好食)
大蘋果
去完古村後繼續沿 401 公路往西行。就到多倫多前一個鐘去左「大蘋果」。呢到有好多唔同味道既蘋果派賣﹐仲有好好味既蘋果片。我就買左個 Apple Maple Pie﹐即係楓樹糖漿味既蘋果派﹐味道一般。 (註﹕蘋果派即時食﹐熱辣辣會好味 D) 之後再繼續沿 401 公路往西行多一個半小時就返到去多論多。 旅程愉快結束。
No comments:
Post a Comment