美國, 波士頓

< photos >

DAY 1
往波士頓出發
一早起身六點幾就出門口﹐七點由多倫多起程前往尼亞加拉大瀑布經彩虹橋過美國境。大概半個鐘就順利過到美 國水牛城﹐一直沿I-90 高速公路八個鐘頭後就到波士頓﹐中途停咗幾個休息站去洗手間。公路沿路無乜景觀欣賞。去到第一個休息站時已經十二點幾﹐喺間叫做Roy Rogers 嘅快餐店度食午餐。叫咗一份炸雞包餐連薯溶同氣水﹐USD $7.39 加稅。個飽裡面無嘢但係你可以自由加生菜﹐番茄﹐酸瓜﹐等…味道唔錯但係就貴咗啲。



昆西市場
夜晚七點就到咗美國自由嘅搖籃—波士頓。昆西市場(Quincy Market) 係啲美國人幾百年前攪獨立﹐脫離英國統治時開會聚集嘅地方。今晚嘅晚餐就喺波士頓好出名嘅昆西市場度食。裡面有幾棟建築物﹐有特色嘅快餐店如海鮮等﹐有餐 廳﹐有名店如Gap, American Eagle﹐又有很多特色小店。因為係十二月所以市場中間有一棵巨形嘅聖誕樹﹐我諗有三至四層樓高﹐夜晚著咗燈真係好靚。



波士頓龍蝦
晚餐就去咗市場內一間好出名嘅海 鮮快餐店度食﹐呢間餐廳叫做 Boston & Maine Fish Company。我叫咗一份十幾蚊美金嘅特價餐。個餐包括一碗周打魚湯﹐裡面有好多龍蝦肉又有好多薯仔﹐好 creamy, 好味道。個餐包一隻龍蝦﹐都幾大隻﹐好多肉﹐餐聽個人幫你切開晒﹐好容易就可以叉啲肉出黎食。食既時候先加啲寧檬汁落隻龍蝦度然後再點牛油汁﹐鮮味無窮﹗ 個餐仲包半塊牛油粟米。食完個餐之後就出去周圍行﹐啲鏈鎖店鋪如American Eagle嘅價錢同加拿大差唔多﹐唔算平。臨走前再入去市場裡面買咗件士多啤梨芝士蛋糕返酒店食﹐好多士多啤梨﹐好好味。今晚住宿喺離市中心唔遠嘅希爾頓 酒店﹐間房幾新﹐幾靚。




DAY 2
哈佛大學
今日七點幾出發去哈佛大學。去咗附近嘅一間餐廳 Z Square 食早餐。我叫咗一份早餐包括麥包﹐煎蛋﹐煎紅皮薯仔加一杯橙汁﹐呢個早餐都差唔多十五蚊。另外再加咗一份朱古力簿餅 (Nutella crepe)跟鮮果﹐好多朱古力漿﹐好好味﹐但係我食完我個份早餐已經好飽﹐所以食得好辛苦。早餐後就去參觀哈佛大學﹐入到去覺得其實無乜特別﹐同其他大 學校院差唔多。加上係聖誕假期嘅關係﹐周圍無乜人。參觀咗哈佛大學嘅法學院同埋圖書館。唔少得嘅就係哈佛個銅像。唔講唔知﹐個銅像唔係以哈佛本人製造﹐因 為無人知道哈佛個樣係點﹐所以就以一為靚仔法國學生而做。傳言話掂一掂個銅像隻腳就會聰明啲﹐雖然我唔信但係一場黎到梗係左右兩隻腳都掂一掂啦﹗其實哈佛 大學原先叫新學院(New College)然後改名哈佛學院(Harvard College) ﹐最後先變成而家嘅哈佛大學(Harvard University) 。點解改名﹖因為哈佛捐咗750 英磅同埋四百本書。最後變成大學係因為一位校長在任時張學校革新變成一間當時現代化嘅學院。





麻省理工學院
下一站就係去離哈佛大學唔遠嘅麻省理工學院﹐原來美國打日本嘅 原子彈都係呢度發明。間學校啲建築幾靚﹐入去周圍行咗一陣。



市內觀光
下一站就係Boston Common﹐一個有二百多年歷史嘅公園。公園對面有一棟屋頂鑲金嘅市政府建築物。我發現美國街頭周圍都見到 Dunkin Donuts﹐就好似加拿大嘅 Tim Hortons 一樣咁多。途經美國聯邦儲備局﹐全美國有十二個包括紐約﹐華盛頓﹐同費城﹐其中一個就喺波士頓。因為想影昆西市場夜晚同日間嘅特色所以就返去琴日去過嘅昆 西市場。感覺就係夜晚去靚啲﹐因為夜晚啲聖誕燈飾真係好靚。



唐人街
之後就去參觀波士頓唐人街﹐雖然無多倫多咁大﹐但係都比我想像中多中國人店鋪同餐廳。裡面有小 型華人超市﹐仲有維他奶賣。我去咗附近嘅一間西餐廳度食lunch﹐食咗一個漢堡包﹐味道唔錯﹐價錢唔貴。特別嘅係呢間餐廳餐前係比啲牛油蛋糕你食﹐而唔 係一般嘅餐包。啲牛油蛋糕好好味﹐仲有啲cream 比你搽上面﹐好味道。



羅德島億萬豪宅
午餐後就離開波士頓﹐啟程去羅德島(Rhode Island)。經過一個多鐘頭嘅車程終於到達Newport 市嘅 The Breakers Mansion —一間有百多年歷史嘅億萬豪宅。屋內嘅裝修物料來自世界各地﹐由名師設計。屋內嘅浴缸四個水龍頭﹐鹹水同淡水嘅冷熱水﹐因為鹹水對身體有益。聖誕期間屋內 有好多聖誕裝飾﹐好靚好靚。百多年前嘅豪華設計絕對值得參觀﹗



美高梅金殿娛樂城
經過一個多鐘頭嘅車程後就到咗康州﹐入住喺2008年6月新開嘅美高梅金殿娛樂城 (MGM Grand at Foxwoods) 。酒店房間幾豪華﹐房內供應多種小食如花生﹐杏仁﹐糖﹐等…當然要錢啦﹐而且價錢一啲都唔平﹐八蚊美金一細樽花生。賭場唔算大但都幾多唔同嘅賭台。賭場內 有幾間名店如Dunhill 同埋 MacAppeal (Apple 嘅專門店) 。但係其他娛樂設施唔多﹐小朋友會幾悶。要一提嘅係﹐美國好多賭場都要21歲以上先入得。間賭場同附近幾間賭場都係連住嘅﹐所以不妨行去其他賭場參觀。晚 餐喺賭場入面一間叫 Junior’s 嘅餐廳度食﹐價錢又貴﹐啲食物超難食。兩個人消費都要 $60 美元﹐一啲都唔值﹐建議你去 food court style 嘅 food market 食好過。




DAY 3
瘋狂購物
今 日五點幾起身﹐六點幾開始回程返多倫多。兩個多鐘頭後停咗喺一個休息站度食麥當勞﹐食咗一份Deluxe big breakfast﹐即係熱香餅加早晨全餐。特別嘅係塊麵包同加拿大嘅唔同﹐美國嘅係好似 Popeyes 個件 biscuit 一樣。四個鐘頭後就到水牛城嘅 outlet mall (Waterloo Premium Outlets) 。呢個outlet 睇落好似好細但係其實行落都幾大﹐有幾多名店如 Coach, Polo, Columbia, Nike, Adidas, 等…。買完嘢就喺 food court 度食 lunch﹐得幾間快餐店﹐無乜選擇。三個鐘頭後就到達免稅店﹐有煙﹐酒﹐手袋﹐香水﹐朱古力﹐等…。買完嘢就經尼亞加拉大瀑布彩虹橋返加拿大﹐過關時要 落車﹐帶護照﹐美國購物單據同埋免稅店買嘅嘢入去過關。好快就過咗關﹐過多一個鐘頭嘅車程就返到去多倫多。