Day 1
多倫多國際機場
一早起身撘車去多倫多國際機場 Terminal 3 （日航 codeshare flight with 美航），辦理登機手續後就預辦美國海關入竟手續。航班準時喺七點四十五分出發，八點二十分到達芝加哥。く當地時間＞要撘 shuttle train 由 domestic terminal 去international terminal，要出關然後再 check 証件。離芝加哥往東京嘅航班仲有三個幾鐘，真係好眼瞓所以我決定除鞋打橫瞓咗喺四張椅上面。等嘅時候好肚餓，入閘前有間麥記但係好貴所以冇食到。諗住入閘 後會有啲平啲嘅嘢食，點知入閘後快餐店都揾唔到，只有小食攤位，最後賣咗一袋 M&M，你估呢包朱古力幾多錢？答案係八個幾美金！
「百事」航空
等機時有一個可愛嘅小朋友見到一架韓國航空嘅飛機就指住同佢媽咪話﹕「Mommy, a "Pepsi" plane!」。韓國航空個 logo 同 Pepsi 又真係幾似喎。
日本航空
上機後本來唸住瞓吓但後見到有啲電影幾好睇所以都係冇瞓到，跟住就打吓機（日航都有唔少 games），睇吓雜誌，時間都過得幾快。十三個鐘內有兩餐飛機餐加一餐小食，啲嘢食唔差。值得一提嘅喺日航嘅長途機有一個自助小食台（有啲航線冇），有 好多日式小食如綠荼味白力枝，米餅等，仲有日航獨有嘅飲品–Sky Time，唔洗驚餓親。
Day 2
東京成田機場
坐咗十三個鐘頭後終於到東京成田機場 Terminal 2，落機後唔洗點排隊好快就過咗海關喇。囉完行李過關就落了面個層嘅 Travel Service Centre 用特價￥3,500 （原價￥3,110）買咗 Suica & N'EX package﹕成田特急單程票由機場去新宿￥1,500 + 市內撘車或購物嘅 Suica 卡 （好似香港嘅八達通）￥2,000（￥500 係押金）。個服務員啲英文幾好。
成田特急
喺個月台等咗一陣架火車就到。車門旁有行李架放大件行李，好方便。啲座位好舒服，如果覺得曬仲可以拉低個窗簾。但係嚟旅行梗係打開窗簾睇風景啦！沿途啲景就好似呵噹卡通裹面咁。
JR 新宿站
大概一個鐘頭車程就到咗 JR 新宿站。因為係放工時間，成個月台都逼滿放工放學嘅人，企都冇位企。拎住幾個大喼穿過啲人仲要上樓梯一啲都唔易。出咗站唔識去新宿太子酒店，諗住間吓人但 係啲人一見你同佢講英文就好驚咁。最後都係靠自已，唔洗好耐就揾到 （大概十分鐘路程）。
新宿太子酒店
Check-in 好順利，個服務員好似英文唔係好好但係基本嘅冇問題。我間三人房喺十幾樓，最近裝修完，又大又豪華。間房其實係間大嘅雙人房，第三張床係張梳化床。房內有部幾大嘅 LCD 電視，雪櫥，電熱水壺，書枱等。浴室就細少少，得企浴，但係牙膏，牙擦，洗頭水，沐浴露，護髮素等應有盡有。(Tip: 如果條毛巾唸住再用嘅話可以放上毛巾架，如果想服務員清潔房間時幫係換新毛巾嘅話就張毛巾放喺浴缸裹面。支持環保！）
晚餐＠天一
咁巧合我舅母喺日本工幹所以約咗我哋一齊食晚餐。喺天一食咗個好好味嘅晚餐。我個餐有麵豉湯，天婦羅，飯，同好多唔同嘅日式前菜。我都唔知原來食天婦羅嘅時候可以加啲白蘿蔔落啲天婦羅嘅汁到，仲可以冇咁熱氣。
夜遊新宿 - 歌舞伎町
因為我舅母識日文又熟悉附近嘅地方所以食完飯佢就帶我哋夜遊新宿，仲教我哋點行。我哋間洒店對面就係歌舞伎町，網上好多人話好雜但係我又唔係好覺。只係見 到好多男仔企係條街度﹝應該係男妓），亦有啲人呤住啲餐廳嘅 menu 叫人去食。但係佢地唔會過棃騷擾你，我覺得冇乜問題。行完就返酒店休息。
Day 3
今天的早餐是昨晚在便利店買的冷麵﹐味道唔錯﹐價錢又平﹐只係幾百￥)。早餐後到 JR 新宿站﹐上班時間站內的人多得很可怖。JR 的售票員不太懂英文但最後都成功買了「都內及近郊一日遊通票 - Tokyo Furii Kippu」 (1580￥)﹐全日任搭 (包東京內大部份交通如 JR 山手線﹐東京地鐵﹐等)。之後便乘 JR 山手線往上野。因為時間還早很多店鋪都未開﹐所以便四處遊覽。
第一站就係上野公園﹐入面有多間博物館﹐美術館﹐等等但都未開。公園內見到好多露宿者在公園的長凳上睡 著。行完就去阿美橫町同埋附近行。
購物後便乘東京地鐵銀座線往淺草。
喺仲見世通食咗好多美味小食﹐包括人形燒和燒墨魚圓。成條街都係賣記念品﹐因為係遊客區﹐所以都唔會點平。
參觀完淺草寺就搭 JR 山手線去東京參觀皇居。呢度環景優雅﹐可以靜靜地休息一陣先再行過。
皇居附近散步時搖遠地見到東京鐵塔。但係比錢上去就唔係好值﹐所以遠望一吓就得啦。
之後搭 JR 山手線去涉谷行吓。跟住就去明治神宮。
JR 原宿站附近有好多店鋪適合年青人﹐諗住最後先去買嘢﹐但最後太累所以都無。行咗成日已經好累啦﹐行去明治神宮條路又鬼咁長﹐ 行成半個鐘﹐個太陽都差唔多落山啦﹗
Day 4
早餐後出發去位於西新宿嘅東京都廳。呢一座 243 米仿似歌德式教堂設計嘅大廈係日本東京都政府嘅總部。
都廳對開個廣場嘅設計好特別﹐好似羅馬嘅聖佰多祿廣場。
廣場嘅地下層有小店鋪同餐廳。都廳開門前已有遊客排隊等﹐我前係是一隊黎自香港嘅旅行團。呢度係一個完全免費嘅景點但係因保安理由﹐所有遊客進入大廈前都要簡單地檢查行李。
從一樓搭電梯只需五十五秒就可以直達四十五樓嘅南展望室欣賞東京嘅風景。展望室仲設有咖啡室同紀念品店。從四十五樓望出嘅風景令人嘆為觀止﹐但係可惜當日天陰所以見唔到富士山同東京鐵搭。
離開時仲落雨。
午餐係新宿嘅東府屋﹐餐廳內差唔多全部都係白領嘅上班一族。我發覺日本人搭抬時多數都係玩手機﹐可能係避免眼神接觸﹖我點咗一客美味嘅炸豬扒飯﹐仲有薯仔﹐但係三文魚湯我只係飲咗幾啖因為我頂唔順D腥味。
醫飽肚就開始購物﹐去咗好多間百貨公司包括﹕小田急、京王、MYCITY、伊勢丹、LUMINE、等等…… 仲有到街上嘅小店鋪購物。當然唔少得去 UNIQLO 買 T-SHIRTS啦﹐ 仲買咗個 EDWIN 銀包。
雨開始越落越大所以諗住早D返酒店休息。途中經過一間 HAAGEN-DAZS﹐見到有綠茶雪糕加紅豆嘅綠茶冰就忍唔住買咗杯﹐ - 正﹗
我喺酒店內個氣水機買咗罐擰檬啤酒﹐其實我唔鐘意飲酒但係見幾特別所以試一試﹐味道唔錯。
諗住小睡後再去逛街﹐ 怎料到我起身時已是零晨三時。令我驚訝的是當我看出窗外竟然看到日出﹗我想不到零晨三時天空已是橙紅色且很光。我立刻拿相機拍下這美麗的景色。
Day 5
今天一早起床便執拾行裝後把行李寄存於酒店大堂。在街上到處逛﹐最後到了 MOS BURGER 吃早餐﹐我點了一個炸蝦飽﹐洋蔥圈和凍奶茶。這一餐比我想像中更加好味。
早餐後在新宿到處逛等待百貨公司開門時把握購物的最後機會。途中發現原來城市中竟有一間小寺。
參觀完便開始購物至中午。打算去吃回轉壽司但要等位﹐最後到了酒店下面吃了個草莓 crepe。
午餐後開始起程步行到 JR 新宿站乘成田特快往成田機場。在機場購物後吃了個魚生飯然後登機。
No comments:
Post a Comment