Black Creek Pioneer Village

琴日同今日係多倫多一年一度嘅Doors Open﹐
即係有100+個地方都有得免費入場參觀。
今日就去咗Black Creek Pioneer Village。

呢間嘢其實喺正York University隔離。
對上次去都差唔多係十年前嘅事。
一早去到已經有條車龍排隊入去﹐
唔洗好耐就到我哋架車﹐停車場收費 $6。
唔緊要啦﹐因為今日係 Doors Open﹐
所以除咗 parking 之外﹐係唔使入場費﹗
入到去就勁多人﹐有好多一家大細﹐所以好多小朋友。
一入去就係個遊客中心﹐有禮品店﹐洗手間﹐等...
仲有個小小嘅博物館。

一穿過個遊客中心就好似時光機返到1800年代嘅加拿大。

呢度其實係一條村莊﹐除咗屋之外﹐仲有旅館...

旅館房間都幾細又冇廁所﹐得床下底個淡罐。

古時嘅商店﹐入面有紀念品賣。

消防車幾特別﹐唔知係用馬定係人手拉呢﹖﹗

呢度係個農場﹐

入面仲有幾隻楊﹐咩咩聲﹐幾得意。

呢個係一個水磨﹐

呢度係個水磨入面下層﹐隔離有好多個齒輪。

間學校得一個課室﹐

入面得塊黑板同一個暖爐。

又發現動物啦﹗

行咗兩個鐘就走啦﹐因為今日都幾熱。

呢度幾岩一家大細﹐鐘意景相嘅朋友都係一個唔錯嘅選擇。

更多照片

更多資料﹕ www.blackcreek.ca

京阪神+廣島之旅 2010 - 預備篇

1. 交通
1.1  飛機
經過多次格價之後﹐今次旅行選擇咗日本航空公司﹐因為價錢方面同路線都好理想。由於日航本身唔飛多倫多﹐所以先要搭聯營嘅美國航空去芝加哥。之後搭日航機去成田機場﹐再轉機去大阪。差唔多要搭十五個鐘頭飛機﹗


1.2  新幹線 (子彈火車)
行程包括廣島﹐所以就要買JR West Sanyo Pass(￥20,000)。呢個pass有效期四日﹐仲可以搭最快嘅新幹線Nozomi。其實呢個pass可以喺多倫多買﹐但係要比手續費﹐同埋個價係會每星期隨住匯率而變動﹐所以都係決定去到日本先買。


1.3  火車 / 地鐵 / 巴士 / 電車 / 船

• 喺大阪會使用大阪兩日周遊券(￥2,700)﹐呢個pass除咗JR之外﹐包括大部分嘅鐵路。最吸印嘅就係﹐個pass仲包括多個景點嘅免費入場券﹐仲有餐廳優惠券﹐絕對超值﹗
• 遊覽京都個日就會搭JR﹐地鐵﹐同埋巴士。呢一日唔會買一日券﹐因為其實唔係搭得太多程﹐所以唔抵。去到嵐山會乘搭嵯峨小火車(￥600)。
• 廣島幾乎每個地方都可以搭電車去到﹐所以呢一日會買一個一日乘車券(￥600)。因為有JR West Sanyo Pass﹐所以可以免費搭船由廣島去宮島。
• 因為神戶唔係太多景點﹐所以呢日唔會買一日乘車券。

2. 住宿

2.1  大阪
喺大阪六日住宿於梅田市中心嘅康斯酒店(Hotel Coms)﹐即前三井都會酒店。酒店直通地下鐵中津站四號出口﹐搭兩個站就到新大阪站﹐幾分鐘地鐵就到心齋橋﹐交通十分方便。早餐喺酒店十七樓﹐可以一路欣賞大阪風景﹐一路享用自助早餐。房間內有得上網。

2.2  廣島

喺廣島就會住喺舒適酒店(Comfort Hotel)。由酒店行幾分鐘就到和平記念公園﹐非常方便。酒店前面幾步路就係電車站﹐去邊都得。

3. 行程

3.1  大阪

3.2  京都

3.3  廣島

3.4  姬路

3.5  神戶

★ 機票
訂機票前自己做咗少少research﹐然後安排我嘅行程。原本諗住飛東京然後搭新幹線落大阪﹐但係最後選擇搭內陸機去大阪﹐因為價錢同飛東京一樣﹐可以慳返唔使買JR Pass (28,300日元)﹐同埋同行嘅人都喺近年去過東京。格過價錢後最後就喺三月中出到機票。

日本航空:

多倫多 → 芝加哥 → 東京 → 大阪
大阪 → 香港
香港 → 東京 → 芝加哥 → 多倫多
 回程喺東京住一晚﹐第二日先再飛過。住成田日航酒店。 

 

★ 火車票
因為行程包括廣島﹐所以要搭新幹線。有幾個方案﹕(1)買JR West Pass﹔(2) 買酒店+火車票 package﹔(3)買夜間巴士票。其實方案二係幾好﹐但係因為冇兩間房﹐所以最後都係選擇咗方案一。JR West Pass 可以喺多倫多買﹐但係要比手續費。所以都係去到大阪機場先買。

★ 酒店
今次旅行用 Jalan 訂酒店﹐因為比起其他網站(如樂天﹐Japanican)係最平。訂咗六晚喺大阪﹐一晚喺廣島。大阪住心齋橋哈頓酒店(Hearton Hotel)﹐而廣島就住舒適酒店(Comfort Hotel)。廣島嘅酒店係平過大阪。兩間酒店都交通方便﹐哈頓酒店隔離就係心齋橋同埋美國村﹐由舒適酒店行5-10分鐘就係原爆紀念館。